Ханилахыг хүссэн хүнээсээ заавал “асуух – 12” асуулт

Иймд эрхэм та зүрхний угаас хайртай, нэгэн биений тань нөгөө хэсэг болоход тохирно хэмээн бодож байгаа хүнтэйгээ ханилан суухаасаа өмнө дараах 12 асуултыг заавал асууж үзээрэй.

1. Чи надад яагаад хайртай вэ?

Ихэнх хүн энэ асуултыг утга учиргүй хэмээн үгүйсгэдэг. Зарим нь хүнийг хайрлахад шалтгаан хэрэггүй гэж хариулдаг. Гэхдээ л хүн аливаа зүйлд шалтгаангүйгээр дурладаггүй шүү дээ. Тэгэхээр хайрт тань таны гадаад үзэмж, материаллаг хүчин зүйлс эсвэл дотоод ертөнцийн алинд нь илүү татагдсаныг энэ асуултаар сонжоод үзэхэд гэмгүй.

01

2. Хоёулаа энд зүгээр л хэсэг чимээгүй сууцгаах уу?

Хосуудын харилцаан дахь чимээгүй байдал бол нэг төрлийн ойлголцлын хэлбэр юм. Заримдаа хайртынхаа хажууд зүгээр л чимээгүй суух амар амгалан байдал үгээр хэлшгүй аз жаргал мэдрүүлдэг. Харин дурлалт хүн тань хамтдаа чимээгүй суухаас эвгүйцэж, зайлсхийж байвал дахин нэг бодож үзэх л асуудал.

3. Ирээдүйн хүүхдүүдийнхээ талаар чи төсөөлж байсан уу?

Энэ бол их чухал асуулт. Зарим хүн хүүхдэд хайртай байдаг бол зарим нь арай өөр. Хайрт тань энэ асуултанд хариулах сонирхол нэг их байхгүй гэдэг нь ажиглагдвал та хоёр илүү нухацтай ярилцах хэрэгтэй. Гэрлэхээр зэхэж буй хосууд ирээдүйн хүүхдийнхээ талаар илэн далангүй ярилцаж, төлөвлөх нь зүйтэй юм.

02

4. Энэ харилцаанаас чи юу хүсэн хүлээдэг вэ?

Хайр сэтгэлийн харилцаанаас хос хоёр өөр өөр зүйлийг хүсэж хүлээдэг бол аажимдаа хүндрэл бэрхшээл учрахыг үгүйсгэх аргагүй. Тийм учраас гэрлэхээсээ өмнө хэн хэнийхээ хүсэл мөрөөдөл, хамтын амьдралынхаа зорилгыг нэгтгэж маргаангүй болгох нь бат бөх харилцааны үндэс болох учиртай.

5. Хэрвээ хоёулаа учраагүй байсан бол өнөөдөр чи хэн байх байсан бол?

Өөртэй чинь учраагүй байсан бол одоогийнхоос илүү дээр байх байсан гэх өнгө аястай хариулт өгч байгаа хүн бол насны хань болох хүн яасан ч биш гэдгийг санахад илүүдэхгүй юм.

03

6. Бие махбодын харилцаанаас гадна юу бидний харилцааг нандин болгодог юм болоо?

Хайр сэтгэл гэдэг зөвхөн бэлгийн харилцаагаар хязгаарлагдахгүй агуу зүйл билээ. Тиймээс хайрттайгаа сексээс өөр сэдвээр харилцааныхаа хамгийн сайн сайхан чанаруудыг ярилцаад үзээрэй.

7. Өнгөрсөн амьдралынхаа талаар надад хэлэхээс эмээдэг дурсамж чамд байдаг уу?

Энэ асуултыг хүчлэхгүйгээр, тун эвтэйхэн асуухгүй бол хайртыг тань эмзэглүүлж магадгүй юм. Хүн бүхэнд л нууц, эмзэг сэдэв байдаг учраас тэр бүхнийг нь хүчээр ухаж төнхөөд хэрэггүй. Харин аажуухан, тайван аргаар та хоёр бүхий л зүйлээ илэн далангүй ярилцах нь илүү дотно, хүчирхэг холбоог бий болгох үндэс болж чадна.

04

8. Чи миний санхүүгийн чадварт итгэдэг үү?

Хамтын амьдралаа цогцлооход хоёр талын санхүүгийн чадвар мэдээж чухал. Тэгэхээр та хоёр бие биедээ итгэж, ажил төрөл цалин мөнгөө хэрхэн зохицуулах зэрэг бүх зүйлээ хамтдаа зохицуулдаг байх хэрэгтэй. Харин бие биедээ итгэхгүй, нэгнийхээ санхүүгийн чадварыг басамжлах зэрэг нь байж болшгүй зүйл билээ.

9. Үглээ хүн гэж яг ямар хүнийг хэлдэг юм бэ? Би үглээ хүн үү?

Та өөрийгөө үглэж байна гэж бодоогүй байхад нөгөө хүнд төвөгтэй сэтгэгдэл төрөх тохиолдол бий. Тэгэхээр хайртай хүнээсээ яг ямар ярианы хэв маягийг төвөгшөөдгийг нь нарийн сайн тодруулаарай.

05

10. Миний зан ааш чамд таагүй сэтгэгдэл төрүүлвэл нуулгүй надад хэлнэ биз дээ?

Таны гаргасан үйлдлээс болж эмзэглэсэн хэрнээ түүнийгээ шууд хэлэхгүй уур уцаартай авирладаг хүнтэй гэрлэвэл насан туршийн зовлон болох эрсдэлтэй. Иймд анхнаасаа л бодогдсон бүхнээ бие биедээ илэрхийлээд, ойлголцож шийдвэрлээд сурчихвал хэн хэндээ амар билээ.

11. Чамд ямар нэг эрүүл мэндийн асуудал бий юу?

Ханилах хүнийхээ ямар нэг зүйлд харшилтай эсэх, эсвэл илүү хүнд асуудал бий эсэхийг нь мэдсэнээр арга хэмжээ авч, зохицон амьдрах бэлтгэлтэй байх боломж бүрдэх юм.

06

12. Намайг хүндээр өвдсөн үед чи дэргэд минь байж, халамжилж чадах уу?

Хайрын үнэ цэн хамгийн хүнд хэцүү үед хувиршгүй сэтгэлээр бие биеэ түшиж тулахад оршдог билээ. Тиймээс хайртаасаа болон өөрөөсөө энэ асуултыг заавал асуугаарай.

 Танд манай мэдээлэл таалагдаж байвал "LIKE" дарж бидэнтэй нэгдээрэй