Х.Янжингаажид: Бид хоёр дах удаагаа яллаа. Шударгаар салж чаддаггүй экс эхнэрээ боож хаадаг олон эрчүүдэд сургамж болно гэдэгт итгэлтэй байна

“Алтан Дорнод Монгол” компанийн захирал Т.Ганболдын эхнэр Х.Янжингаажид өөрийн цахим хуудсаар дамжуулан дараах зүйлсийг бичжээ.

“Бид хоёр дах удаагаа яллаа. Эхний ялалт маань Улсын Бүртгэлийн Ерөнхий Газартай нийлж гэрлэлтийн гэрчилгээг устгасанг хүчин төгөлдөр гэж үзсэн явдал байсан. Тун удахгүй гурав дах буюу гэр бүлээ цуцлуулах маргаан байх болно.

Өчигдөр буюу 2023.09.12-нд Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх дээр машиныг минь хулгайлсан хэргийн шүүх хурал 2 жилийн хугацаанд 5 удаа хойшилсоны эцэст анх удаа боллоо.

Шүүхээр нотариатч Б.Энхээ, Корпорейт зочид буудлын хамгаалалтын албаны дарга бөгөөд Ганболдын хамаатан Б.Баяраа, тус буудлын захирал бөгөөд Ганболдын нагац эгч С.Отгондулам нарт холбогдох хэргийг шүүн хэлэлцэж дээрх хүмүүс машиныг маань 2 жилийн дараа буцаан өгч хохирлыг маань барагдуулснаар Б.Энхээ, Б.Баяраа нарт мөнгөн торгуулийн ял, С.Отгондуламыг энэ хэрэгт ялгүй үлдээлээ.

Эдгээр хүмүүс намайг маш ихээр урлуулан гомдоосон ч энэ хэргийг өөрсдийн санаачлага болон хүслээр хийгээгүйг мэдэж байгаа тул байж болох ялын доод хэмжээг өгөхийг би шүүгчээс хүссэн. Хулгай л бол хулгай. Хулгай нь баригдахаар “За за май буцаагаад өгсөн юм чинь ялгүй, тоглосон юм” гэдэг заалт Монголын хуулинд байхгүй.

2 жилийн хугацаанд алдсан боломж, сэтгэл санааны хохирол, хөрөнгийн маань элэгдэл хорогдол, надаас гарсан зардал мөнгийг бодсон ч огт гомдолгүй байх ямар ч боломжгүй. Тиймээс эдгээр хүмүүс ялын доод хэмжээг авлаа.

Удахгүй гэр бүлийн маргааны шүүх хурал болно. Бидний хамтын хөдөлмөрөөр бий болсон компаниудыг Тордайн Ганболд ганцаар дур мэдэн, нууцаар өөрийн төрсөн эх болон хамаатан садныхаа нэр рүү шилжүүлсэн булхайг он цаг дараалалтай нь баримттай гаргаж ирэх хэрэг.

Яг энэ машины хэрэг шиг эцсийн өмчлөгч нь хэн, анх энэ бүхэн хаанаас, хэзээнээс, хэнээс, юунаас угшилтай гэдэг нь ил гараад ирнэ. Цаг хугацааны л асуудал. Энэ цаг хугацааг хэмнэх үү? Эсвэл хамаатнуудаараа бүх зүйлээ ухуулж төнхүүлж, байцаагдаж мөрдөгдөж, олон нийт, хэвлэл мэдээлэлд далан булчирхайгаа тоочуулах уу? Эсвэл ухаалаг байж учраа ололцох уу?

Эвээр, шударгаар салж чаддаггүй экс эхнэрээ боож хаадаг олон эрчүүдэд сургамж болох, олон мундаг ээжүүдэд итгэл найдвар өгөх кейс болно гэдэгт итгэлтэй байна.

2 жил орчим үргэлжилсэн уг хэрэг дээр маань сэтгэл гарган, уйгагүй хамт байсан Б.Мэргэндээ дахин маш их баярлалаа. Цаашдынх нь ажил, амьдралд нь өндрөөс өндөр амжилт, аз жаргалыг хүсээд, шударга үнэний төлөө чангаас чанга дуу хоолой болж яваарай хэмээн хүсэн ерөөе.”